telefeshinka Sky Sports ayaa kahor kulankii xalay dhex maray kooxaha Manchester City iyo Crystal Palace arrin in lagu maadsado keentay ku sameeyay daafaca City ee Manuel Akanji.
Sky Blues ayaa cadaadiska kusii haya kooxda hoggaanka haysa ee Arsenal iyagoo 1-0 kaga soo adkaaday Palace kaddib gool ka yimid Erling Haaland oo rigoore ahaa.
Pep Guardiola ayaa daafaca kooxdiisa kulankaas kusoo wada bilawday John Stones, Manuel Akanji, Ruben Dias iyo Nathan Ake balse Sky Sports ayaan u muuqan kuwo sawir dhammaystiran ka haya Akanji.
Arrinta hadal haynta badan dhalisay ayaa ahayd in Sky ay Akanji kurkiisa saareen jidh u muuqday midka xiddiga jidhka yar ee kooxdiisa ee Bernardo Silva.
Waxa arrintaas arkay dadka muuqbaahiyaha kala socday kuwaas oo baraha bulshada gaar ahaan Twitter-ka ku lafo-guray.
Akanji ayaa suuqii xagaaga ee sanadkii hore kusoo biiray Manchester City oo uu heshiis 15 Milyan oo pound ah ugaga yimid Borussia Dortmund.
Wakhtiga Akanji yimid Etihad Stadium ayaa ahayd September waana xilli aysan Sky Sports ka heli karin sawir dhammays ah oo ay ciyaartoyda hore uga wada qaadeen.