Kooxda kubadda cagta PSG ayaa dhamaystirtay heshiiska shaqsiga ah ee xiddiga reer France ee Ousmane Dembele oo xalay ogolaaday inuu ka tago Barcelona oo uu u wareego PSG, isaga oo aqbalay dalab uga yimid kooxda waddankiisa ka dhisan oo uu doonayo inuu u wareego.
Ousmane Dembele waddanka Faransiiska ayaa sheegtay in Ousmane Dembele oo qandaraaskiisa Barcelona ay ka hadhsan yihiin 12 bilood oo kaliya, in uu heshiis shan sannadood ah la gaadhay PSG, waxaanay kooxda reer France mar dhoweyd u dirtay Barcelona dalab ay ku caddaynayso inay bixinayso lacagta lagu burburin karayo heshiiska laacibkan oo ah €50 milyan oo Euro.
Warbaahinta Faransiiska ee sheegtay, in heshiiska shaqsiga ah ee Ousmane Dembele ay PSG dhamaystirtay, ma aanay faahfaahinin gunnooyinka iyo mushaharka uu xiddigani ka qaadan doono Parc des Princes.
Wararka ayaa sheegaya in waqtigu ku gaaban yahay PSG oo kaliya 9 saacadood ka hadhsan yihiin xilliga uu meesha ka baxayo qodobka dhigaya in €50 milyan oo Euro lagu burburin karayo heshiiska Dembele, hase yeeshee waxa ay wada-hadallo toos ah u socdaan labada kooxood oo doonaya inay heshiis buuxa oo niyad-samaan ku dheehan tahay ka gaadhaan iibka laacibkan. Dhinaca kale, Ousmane Dembele ayaa mar dhoweyd kooxdiisa Barcelona ka codsaday inay u ogolaadaan in uu tago PSG oo ay iyaguna qaataan lacagtii ku xidhnayd qandaraaskiisa, si rasmi ahna ay ugu fasaxaan inuu wada-hadal buuxa la yeesho kooxda waddankiisa ka dhisan, taas oo loo fahmay in uu doonayo in uu si fiican oo lagu wada qanacsan yahay kaga tago Barcelona.