Jarmalka ayaa lagu wadaa inuu ballaariyo baaritaannada xuduudaha ka dib weerar mindi oo saddex qof ay ku dhinteen oo ka dhacay magaalada Solingen bishii Agoosto.
Dowladda ayaa cadaadis ku saartay inay go’aan adag ka qaadato soogalootiga tan iyo markii uu weererku dhacay, kaas oo tuhmanuhu uu ahaa muwaadin Suuriyaan ah oo wajahaya in la tarxiilo ka dib markii uu ku guuldareystay codsi magangalyo.
Weerarka ayaa waxaa sheegatay kooxda Daacish.
Koontaroolada cusub – oo la soo bandhigi doono 16-ka Sebtembar ayaa lagu dhawaaqay maalmo ka dib markii ka-hortagga soogalootiga Jarmalka (AfD) uu guulo waaweyn ka gaaray doorashooyinkii deegaanka.
Wasiirka Arrimaha Gudaha ee Jarmalka Nancy Faeser ayaa ku adkaysatay in dawladdu “ay go’aan adag ka qaadanayso” socdaalka aan joogtada ahayn, waxayna sheegtay in baaritaanku uu yarayn doono xagjirnimada iyo dambiyada ka gudba xuduudaha.
“Waxaan sameyneynaa wax walba oo aan awoodno si aan dadka dalkeena aan uga ilaalino khatarahaas,” ayay raacisay.
Jarmalku waxa uu horeba kontaroolo ugu lahaa xudduudaha bari iyo koonfurta uu la leeyahay Poland, Czech Republic, Switzerland iyo Austria, kuwaas oo ugu horrayn lagu baaro tareennada. Tallaabooyin la mid ah ayaa lagu soo bandhigi doonaa dhammaan meelaha xuduudaha ah.
Si kastaba ha ahaatee, dadka dhaliila ayaa sheegay in tallaabadan ay tahay mid ku saabsan siyaasadda marka loo eego amniga.