Kooxda kubadda cagta Real Madrid ayaa diyaarisay lacagta ay u qorshaysay inay Chelsea kaga soo qaadato xiddig ay adag tahay in Blues ay si fudud ku fasaxdo, kaas oo haddii ay Los Blancos ku guuleysato saxeexiisa ka mid noqonaya ciyaartoydii ugu qaalisanayd ee ay abid iibsato Real Madrid.
Los Blancos ayaa waxa xilli ciyaareedkan ku yimid hoos u dhac, waxaana meelaha ay ka liigayaan ku jira labada dhinac ee difaaca iyo weerarka dhexe oo Karim Benzema ay dhaawacyo badan soo gaadheen, halka booskii Casemiro ee kubbad-burburinta aanay wali helin ciyaartoy si fiican u buuxin kara.
Kulamadii ugu dambeeyey ee ay ciyaartay Real Madrid, waxa rikoodho fool-xun loo diiwaangelinayay Dani Carvajal oo booskiisu uu waddo u noqday weeraryahannada, sidoo kalena kubbaha loo dhiibo ciyaartoyda kasoo horjeedda u dhiibayay.
Sida uu qoray wargeyska Fichajes, Real Madrid ayaa waxay doonaysaa in ay Dani Carvajal ku beddesho difaaca reer England ee Reece James ee lama-taabtaanka u ah Chelsea, waxaanay u qorsheeyeen in €102 milyan oo Euro oo ay xagaaga dul=dhigi doonaan. James oo bishii September u saxeexay Chelsea heshiis cusub oo soconaya illaa sannadka 2028, ayay Real Madrid doonaysaa inay isku daydo inay dhinaca dhaqaalaha kasoo marto Blues oo la rumaysan yahay inay iibin doonto qaar ka mid ah ciyaartoydeeda si ay uga badbaado in lagu ganaaxo jabin sharciga dhaqaalaha ah.