Daafaca halyeeyga ah ee kooxda Real Madrid ee Marcelo Vieira ayaa doortay ciyaaryahanka uu u arko midkii ugu dhibka badnaa ee uu waayihiisa ciyaareed ee dahabiga ah soo wajahay.
Brazilian-kaas ayaa 15 xilli ciyaareed kusoo qaatay Real Madrid isagoo noqday ciyaaryahanka ugu koobabka badan taariikhda kooxdaas kaddib 25 koob oo uu lasoo hantay kahor inta uusan ka dhaqaaqin 2022.
Ciyaaryahanka uu u arko midka ugu adkaa ee uu kahor tagay ayaa ah halyeeyga Barcelona ee Lionel Messi oo haatan ka tirsan Paris Saint-Germain, Marcelo ayaa ahaa midka ay badi si fool ka fool ah isku hor taagnaayeen Argentine-kaas.
Marcelo oo warsidaha The Athletic la hadlay ayaa yidhi “Messi waa mid cajiib ah, ciyaaryahankii ugu adkaa ee aan wajahay”.
“Dhammaanteen waynu ognahay tayada uu leeyahay xataa hadda oo uu 35 sano jir yahay, hadda kahorna sidaas oo kale ayay ahayd”.
“El-Classico markasta wuxuu ahaa mid kamida kulamada ugu wanaagsan ee la daawado ama la ciyaaro, nasiib ayaan ku leeyahay inaan kasoo muuqday mid kamida wakhtiyadii ugu fiicnaa Classico”.
Marcelo ayaa 2007 ku biiray Los Blancos waxaana mudadaas uu kooxda joogay uu soo gaadhay 12 guulood oo Classico ah halka 16 laga adkaaday.