Wadaxaajoodyo u dhexeeya saraakiisha Maraykanka iyo Ruushka ayaa ka billowday Riyaad, kullankaas oo Ukraine ka maqantahay miiska wadahadallada.
Wasiirka Arrimaha Dibadda ee Ruushka, Sergey Lavrov, ayaa hoggaaminaya wafdiga Ruushka ee la kulmaya saraakiil Mareykan ah, oo uu ku jiro Xoghayaha Arrimaha Dibadda Marco Rubio, si ay uga wadahadlaan dagaalka Ukraine.
Wasiirka Arrimaha Dibadda ee Ruushka, Sergey Lavrov, iyo la-taliye sare oo ka tirsan xafiiska Putin, Yuri Ushakov, ayaa ku sugan Sacuudiga si ay ula kulmaan Xoghayaha Arrimaha Dibadda ee Mareykanka, Marco Rubio, La-taliyaha Amniga Qaranka, Mike Waltz, iyo Ergayga Gaarka ah ee Mareykanka u qaabilsan Bariga Dhexe, Steve Witkoff.
Kulanku wuxuu ka qabsoomayaa qasriga Diriyah ee ku yaal Riyaad.
Afhayeenka Kremlin-ka, Dmitry Peskov, ayaa warbaahinta u sheegay in wadahadalladu ay diiradda saari doonaan “soo celinta xidhiidhka Mareykanka iyo Ruushka ee dhan walba.”
Wuxuu intaa ku daray in sidoo kale laga wada hadli doono “suurtagalnimada wadahadallo ku saabsan xalka Ukraine iyo abaabulka kulan dhex mara labada madaxweyne.”
Sidoo kale, ilo xog ogaal ah oo ku dhow diblomaasiyiinta Ruushka ayaa sheegay in qoddobada laga wadaxaajoonayo ay ka mid yihiin qaabkii cunaqabateynta looga qaadi lahaa Ruushka.
Shirkadaha Mareykanka ayaa khasaaray lacag dhan $300 bilyan kadib markii ay ka baxeen xidhiidhka Ruushka.
Madaxa Sanduuqa Horumarinta Qaranka ee Ruushka, Kirill Dmitriev, ayaa sheegay in wadahadallada ka socda Riyaad ay yihiin kuwo muhi ah. Wuxuu xusay in uu aaminsan yahay in shirkadaha waaweyn ee shidaalka Mareykanka, ee hore uga baxay Ruushka, ay mar uun dib ugu laaban doonaan.
“Waa muhiim in la fahmo in shirkadaha Mareykanku ay khasaareen ilaa $300 bilyan kadib markii ay ka baxeen Ruushka,” ayuu yidhi ka hor inta uusan kulanku furmin.
Wuxuu intaa ku daray: “Waxaa jira khasaare dhaqaale oo weyn oo soo wajahay waddamo badan, marka la eego xaaladda taagan, waxaana aaminsanahay in xalka ugu habboon uu yahay in la helo dariiq hore loogu sii socon karo.”
Shirka oo maanta ka billowday Riyaad ayaa ku soo beegmaya xilli shalay Hoggaamiyeyaasha Yurub ku kulmeen Paris kuwaasoo ka arrinsaday inay u heellan yihiin inay Ukraine siiyaan dammaanad amni, iyagoo ka digay in halis iyo hagardaamo tahay in la gaadho xabbad-joojin iyada oo aan heshiis nabadeed lala gaalin Ruushka.
