Muddo 20 maalmood ah ayuu Xabsi ku jiraa Maxamed Cabdi Sheekh Ilig, Guddoomiyaha Telefishanka MMTV. Ma jirto dacwad lagu soo oogay iyo Maxkamad rayid ah oo la hor geeyey muddadas uu xidhan yahay.
Xadhigga Maxamed Ilig oo loo maray qaab sharci darro ah oo ka soo horjeeda Dastuurka Somaliland iyo xeerarka dalka, ayaa waxa uu weli ku jiraa xabsi muddo ka badan intii dastuurku waajibinayey ee ahayd 48 saacadood gudahood lagu horgeeyo Maxkamad, balse Maxkamad la’aan ayuu xidhan yahay 480 saacadood (20 maalmood).
Ma jirto kiis loo haysto oo ilaa imika la caddeeyey, ciddii xidhay iyo Xeer ilaalinta ayaan wax dacwad ah Maxkamadda hor keenin.
Maxamed Cabdi Ilig, oo sharci darrooyin badani ku dhaceen, kuwaas oo ay ka mid ahaayeen in si sharci darro ah oo bilaa waaran ah lagu xidhay, isaga oo shaqadiisa ku guda jira, waxa loo geystay jidh dil oo ilaa imika xabsiga dhexdiisa ugu xanuunsanayo welina dhakhtar lama geyn, waxa kale oo sharci darada dhacday ka mid ahaa in Maxkamad Ciidan la horgeeyey iyo in amarkii Xeer ilaalinta ee ahaa in deg deg kiiskiisa loo soo wareejiyo aanay dhicin.