Ugu yaraan 113 qof ayaa ku dhintay in ka badan 150 kalena way ku dhaawacmeen dab ka kacay xaflad aroos oo ka dhacaysay waqooyiga gobolka Nineveh ee dalka Ciraaq, sida ay sheegeen saraakiisha maxalliga ah iyo kooxaha gurmadka degdegga ah.
Guddoomiye ku xigeenka gobolka Nineveh Hassan al-Allaq ayaa wakaaladda wararka ee Reuters u sheegay in ilaa hadda la xaqiijiyey dhimashada 113 qof. Dabka ayaa la sheegay in uu kacay abaaro 10:45pm xiliga maxaliga ah (19:45 GMT) habeenimadii talaadada.
Najim al-Jubouri, oo ah barasaabka gobolka Nineveh, ayaa ka digay goor hore oo arbaca ah in aysan wali jirin tiradii ugu dambeysay ee khasaaraha dabka, taas oo soo jeedinaysa in dhimashadu ay weli sii kordhi karto.
“Dhammaan dadaallada waxaa lagu bixinayaa sidii gargaar loo fidin lahaa kuwa ay saameeyeen shilka nasiib-darrada ah,” ayuu yiri afhayeenka wasaaradda caafimaadka Ciraaq Saif al-Badr.
Wakaalada wararka ee Ciraaq ee INA ayaa goor sii horeysay sheegtay in in ka badan 150 qof ay sidoo kale ku dhaawacmeen dabkaasi oo qabsaday hool xafladeed oo ku yaala degmada Hamdaniyah ee gobolkaasi oo ay ka socotay xaflada arooska. Hamdaniyah waxay ku taal meel ka baxsan waqooyiga magaalada Mosul, oo qiyaastii 400km (qiyaastii 250 mayl) waqooyi-galbeed kaga beegan caasimadda Baqdaad.
Difaaca madaniga ah ee Ciraaq ayaa sheegay in warbixinadii ugu horreeyay ay muujinayaan in rashka la isticmaalay intii lagu jiray dabaaldega laga yaabo inay sabab u ahayd dabka. “Macluumaad horudhac ah ayaa tilmaamaya in rashka la isticmaalay intii lagu jiray arooska, taas oo kicisay dab ka kacay hoolka,” mas’uuliyiinta difaaca madaniga ayaa bayaan ku sheegay horraantii Arbacada.