Ruushka ayaa weerar dhanka cirka ah ku qaaday mid ka mid ah dekedaha ugu weyn ee laga dhoofiyo badarka Ukraine, saacado ka hor inta aysan wada hadal yeelanin madaxweynaha Ruushka Vladimir Putin iyo dhiggiisa Turkiga, Recep Tayyip Erdogan.
Ciidamada Cirka ee Ukraine ayaa Isniintii ku booriyay dadka deggan dekedda Izmail, oo ka mid ah labada dekedood ee ugu weyn ee laga dhoofiyo hadhuudhka ee ku yaal Wabiga Danube ee gobolka Odesa, inay raadsadaan gabaad.
Qaar ka mid ah warbaahinta Ukraine ayaa sheegay in dhawaqa qaraxyo ka dhacay aaggaasi.
Weerarkan ayaa ku soo beegmay xili Putin iyo Erdogan ay ku kulmayaan magaalada Sochi ee badda Madow ee Ruushka si ay uga wada hadlaan heshiis ku saabsan dhoofinta badarka Ukrain kaas oo gacan ka geystey in la yareeyo dhibaatada cuntada ee ka jirta qaybo ka mid ah Afrika, Bariga Dhexe iyo Aasiya.
Heshiiska – oo ay garwadeen ka ahaayeen Qaramada Midoobay iyo Turkiga bishii Luulyo 2022 – ayaa oggolaaday ku dhawaad 33 milyan metric tonnes (36 milyan oo tan) oo hadhuudh ah iyo badeecooyin kale inay ka baxaan saddex dekedood oo Yukreeniyaan ah in kasta oo Ruushku soo duulay.
Laakiin Moscow waxay ka baxday heshiiska lix toddobaad ka hor, iyada oo ka cabanaysa in dhoofinta cunnada iyo bacriminta ay la kulmeen caqabado iyo in hadhuudh ku filan Yukreeniyaan uusan aadin dalalka u baahan.