Dawladda Hindiya oo ka mid ah aasaasayaasha Isbahaysiga dhaqaalaha ee Bricks, ayaa si weyn u xiisaynaya inuu Shiinaha kula tartamo galangalka dalalka Afrika, si uu xidhiidh ganacsi iyo mid dublamaasiyaddeed ula yeesho.
Shirkii dhwaan ka dhacay Kuunfur Afrika ee ay isugu yimaadeen dalalka xubnaha ka ah Ururka Bricks, ayaa waxa la sheegay in ay Hindiya hoosta ka calaamadisay dalal ay Somaliland ku jiro oo ku yaala meelo istiraatiji ah in ay la yeelato xidhiidhkii iyo macaamil ganacsi oo fure u noqda in ay Somaliland u noqoto albaabad ay ka gasho dalalka Afrika.
Warbixin lagu daabacay Wakaaladda Wararka ee firstpost, ayaa waxa lagu sheegay in Hindiya oo ah quwad soo koraysaa ay doonayso ay si deg deg ah u balaadhiso saameynteeda Afrika, si ay ula tartanto Shiinaha, waxaanay isha ku haysaa in Congo iyo Somaliland ay noqon doontaa dariiq wanaagsan oo Afrikaanka ka gasho.
“Dawladda Hindiya waxa ay u aragta Afrika suuq dihin oo ay u iib geyn karto Wax soo saarkeeda Wershadaha iyo Tignoolajiyadda iyo meel ay la samayn karto iskaashi ganacsi iyo mid siyaasaddeed, madaama oo dalal Shiinuhu ka mid yahay uu hore kaalin weyn ugu lahaa”
Maxay Hindiya u doorbidaysaa in ay si gaar ah xidhiidh ganacsi iyo iskaashi ula yeelato Somaliland iyo Congo.
Somaliland, oo dal aan aqoonsi haysan oo ku yaala geeska Afrika, ayaa isagu Hindiya u aragtaa ama u leh muhiimad Istiraatijiyadeed, marka la eego goobta ah dhacdo juruqaafi ahaan.
Sidoo kale, Somaliland waxay leedahay xeeb dhererkeedu yahay 700 kiiloomitir oo ku taal Badda Cas OO ku dhow marin biyoodka muhiimka ah ee Bab-el-Mandeb, oo ah goob ay maraan inta badan ganacsiga adduunka.
Waxa kale oo ay Hindiya u aragtaa Somaliland meel haddii ay u baahdo ay saldhig ciidan oo badda ah ka dhigan karto, isla markaana ganacsigeeda u socda Afrika, gaar ahaan Itoobiya oo dhawaan ku biirtay Ururka Isbahaysiga Bricks ay ka dejiso Dekedda Berbera.
Congo, waa dalka labaad ee ugu weyn Afrika, waa dal qani ku ah khayraadka dabiiciga ah, iyada oo dadka ku takhakhusay cilmiga dhulka sheegayaan in Khayraadka dalkaas ku jira lagu qiyaas 24 tirilyan oo dollarka Marykanka ah, waxaanay Hindiya u aragtaa meel muhiim u ah waxsoosaarka warshadaheeda iyo in ay ka hesho macdanaha ay u baahan tahay.