Ruushka ayaa ku eedeeyay Ukraine weerar diyaaradeed oo ay ku qaaday Moscow oo ay ku burburisay laba dhisme oo muddo kooban xidhay mid ka mid ah garoomada diyaaradaha ee magaalada Moscow.
Diyaarad nooca aan duuliyaha lahayn ah ayaa lagu soo riday degmada Odintsovo ee galbeedka magaalada bartamaheeda, labo kalena waa laga saaray balse waxay ku burburtay xafiisyo, sida ay sheegtay wasaaradda difaaca ee Ruushku.
Hal qof ayaa ku dhaawacmay, sida ay ku warrantay wakaaladda wararka ee dawladda Ruushka ee Tass.
Duqa magaalada Sergei Sobyanin ayaa sheegay in wejiyada labada dhisme ee xafiisyada ay waxyeelo yar soo gaadhay.
Sawirro laga soo qaaday halka uu qaraxu ka dhacay ayaa muujinaya in dhowr daaqadood ay waxyeelo soo gaadhay geesaha dhismayaasha, iyadoo burburku uu daadsan yahay dhulka hoose.
Mid ka mid ah goobjoogayaasha oo magaceeda ku koobtay Liya ayaa wakaaladda wararka ee Reuters u sheegtay inay arkaysay dab iyo qiiq.
“Waxaan maqalnay qarax, wuxuuna u ekaa sidii mowjad, dadka oo dhan ayaa booday,” ayay tidhi.