Sacuudi Carabiya ayaa ogolaatay inay iibsato diyaaradaha aan duuliyaha lahayn ee Turkiga, oo ka mid ah qandaraasyo badan oo faa’iido leh oo uu Madaxweyne Recep Tayyip Erdogan ku hubsaday dhaqaalaha Turkiga ee la halgamaya iyadoo Ankara ay ka faa’iideysanayso dadaalkiisii diblomaasiyadeed ee uu dhowaanahan uu ku hagaajinayey xidhiidhka quwadaha Khaliijka Carabta.
Madaxweyne Erdogan ayaa maanta gaadhay dalka Sacuudiga, isagoo ay la socdaan 200 oo qof oo ganacsato ah, sida laga soo xigtay guddiga xidhiidhka dhaqaalaha dibadda ee Turkiga, taasoo qeyb ka ah socdaal saddex joogsi ah oo uu ku marayo gobolka.
Labada dal waxay kala saxiixdeen heshiisyo is-afgarad ah oo dhinacyo badan leh, oo ay ku jiraan tamarta, maalgashiga tooska ah iyo warshadaha difaaca.
Erdogan iyo Dhaxal-sugaha Sacuudiga Maxamed Bin Salmaan ayaa ka qeyb galay xafladda ay ku kala saxiixdeen shirkadda difaaca Turkiga ee Baykar iyo wasaaradda gaashaandhigga Sacuudiga, sida ay ku warrantay wakaaladda wararka ee Sacuudiga ee SPA.
Sacuudi Carabiya waxay heli doontaa diyaaradaha aan duuliyaha lahayn “iyadoo ujeedadu tahay kor u qaadista diyaargarowga ciidamada qalabka sida ee Boqortooyada iyo xoojinta awoodeeda difaac iyo wax soo saar”, Wasiirka Difaaca Amiir Khalid bin Salman Al Saud ayaa ku sheegay bartiisa twitter-ka .